Int jaer ons heren 1378 des vridaghes voer zinte
Urbaens dach wart dit punt dat hier na bescreven staet overdragh[en]
bi onzen heren van Utrecht. Bi out reat ende bi nye ghemeene morghen
sprake van allen ghilden.
Di ghoede lude vanden ghilden, de raet out ende nywe doet u teweten
hoe dat si om orbaar der stat ende des ghemeen coopmans overdraghen
zijn mit onsen heren van Utrecht opter ghilden verbeteren, dat men van
deser tijd voort jaerlix dre vry jaermarkten houden zel binnen Utrecht
van allen ghoede. Ende elke markte zel hebben dre toghel daghen. Ende
die eerste marckte zel in gaen op sinte Victoors avond naest comende
ende die dre togheldagse zellen wezen die eerste dre daghe na zinte Victoors
dach. Ende die ander marckte zel in gaen op ten pam avont daer naest
comende. Ende die togheldagen zellen wezen die eerste dre daghen na palm
dach. Ende die derde marckte zel in gaen op viertien daghe voer pinxteren
daer naest comende ende die togheldagen zellen wezen de eersten drie daghe
voer ons heren hemelvaerts dach ende alzop wert jaerlix.
die haer ter marckten comen zellen hebben een goet vrij gheleyde van onzes
heren van Utrecht en van der stat vrijlich te varen ende te keren in der stat
ende inden lande van Utrecht mit horen live ende mit horen ghoede
durende achte daghe voer ende achte dagne na elken tunne voerst
uutghenomen of yemant binnen dezer voerzeyder marckten mysdede
ende utghenomen die ballinghe ofte vredeloos gheleyt zijn der stat
ofte des lants van Utrecht ofte die ons heren van Utrecht ofte der
stat vyande zijn. Behoudeliken onzen heren van Utrecht ende zinen naco-
melinghen bisschoppen t'Utrecht hare tollen ende al hoers rechts ende
der stat van Utrecht af haars rechts.
